கோயம்புத்தூர் சகோதயா பள்ளிகள் கூட்டமைப்பு சார்பில் பள்ளிகளுக்கு இடையேயான இரண்டு நாள் அறிவியல் கண்காட்சி ‘இக்னிசியா 2026’, கேபிஆர் கலை, அறிவியல் கல்லூரி மற்றும் ஆராய்ச்சி நிறுவனத்தில் நடைபெற்றது.
கண்காட்சியை பிரபல விண்வெளி விஞ்ஞானியும், முன்னாள் இஸ்ரோ இயக்குநருமான பத்மஸ்ரீ மயில்சாமி அண்ணாதுரை தொடங்கி வைத்து, மாணவர்களின் அறிவியல் படைப்புகளைப் பார்வையிட்டு அவர்களுடன் கலந்துரையாடினார்.
நிகழ்ச்சியில் பேசிய மயில்சாமி அண்ணாதுரை, “மாணவர்கள் தங்களது எதிர்காலத்தை தாங்களே வடிவமைப்பவர்களாக இருக்க வேண்டும்” என அறிவுறுத்தினார். புதுமையான சிந்தனையே புதிய தீர்வுகளுக்கான முக்கியத் திறவுகோல் என்றும், சமூகத்தின் பிரச்சினைகளை ஆழமாகக் கவனித்து, வழக்கமான சிந்தனை முறைகளுக்கு மாற்றாக சிந்திக்க வேண்டும் என்றும் கூறினார்.
சந்திரயான்-3 திட்டத்தின் வெற்றியை எடுத்துக்காட்டாகக் குறிப்பிட்ட அவர், நிலவின் தென் துருவப் பகுதியை ஆராய்ந்ததன் மூலம் இந்தியாவின் அறிவியல் திறனை உலகமே அறிந்துள்ளதாக தெரிவித்தார். மாணவர்களின் ஆர்வம் மற்றும் திறமைகளை சரியான முறையில் வளர்த்து, அவற்றை பயனுள்ள புதுமைகளாக மாற்ற வேண்டும் என்றும் வலியுறுத்தினார்.
மேலும், கோயம்புத்தூரின் அறிவியல் மற்றும் தொழில்நுட்ப பாரம்பரியத்தை சுட்டிக்காட்டிய அவர், டாக்டர் ஏ.பி.ஜே. அப்துல் கலாம் மற்றும் ஜி.டி. நாயுடு ஆகியோரின் முன்னோடிப் பங்களிப்புகளை நினைவுகூர்ந்தார்.
இக்கண்காட்சியில் 49 பள்ளிகளைச் சேர்ந்த 1,300 மாணவர்கள், சமூகத்தின் முக்கிய சவால்களுக்கு தீர்வு காணும் வகையில் 391 அறிவியல் படைப்புகளை காட்சிப்படுத்தினர். சுகாதாரம் மற்றும் மனித நலன், பேரிடர் தயார்நிலை மற்றும் காலநிலை மாற்றத்தை எதிர்கொள்ளும் திறன், சமூகத்திற்கான டிஜிட்டல் தொழில்நுட்பம், நிலையான வேளாண்மை மற்றும் உணவுப் பாதுகாப்பு ஆகிய நான்கு முக்கிய கருப்பொருள்களில் மாணவர்களின் படைப்புகள் இடம்பெற்றன.
நிகழ்ச்சியின் ஏற்பாடுகளை கோயம்புத்தூர் சகோதயா பள்ளிகள் கூட்டமைப்பின் தலைவர் நவமணி, துணைத் தலைவர் ஞானபண்டிதன், பொதுச் செயலாளர் டாக்டர் அரசு பெரியசாமி, இணைச் செயலாளர் சி. சாம்சன், கூட்டு செயலாளர் டாக்டர் அபிஷேக் பால் ஜாக்சன், பொருளாளர் லில்லி பிரின்சி உள்ளிட்டோர் ஒருங்கிணைத்தனர். மேலும் பாப்பி ராய், மதி செல்வி, சந்திரன், கர்ணபிக்வாரி, பிரேமா, சார்லின் ஆகியோரும் முக்கியப் பங்காற்றினர்.
மாணவர்களின் அறிவியல் ஆர்வம், புதுமைச் சிந்தனை மற்றும் படைப்பாற்றலை ஊக்குவிக்கும் வகையில் நடைபெற்ற ‘இக்னிசியா 2026’, இளம் அறிவியல் படைப்பாளிகள் தங்களது கற்பனை மற்றும் திறமைகளை வெளிப்படுத்தும் சிறப்பான தளமாக அமைந்தது.