கோவையில் இளம் தலைமுறையினரின் சிந்தனையில் சமூக மாற்றத்தை ஏற்படுத்தும் வகையில் நடத்தப்பட்ட ‘Kutty Director Season 2’ குறும்படப் போட்டியின் விருது வழங்கும் விழா கோவை அவிநாசி சாலையில் உள்ள Cars 327 Showroom வளாகத்தில் நடைபெற்றது.
இந்த விழாவில், கோவை, சென்னை, மதுரை, திருநெல்வேலி, கன்னியாகுமரி, விழுப்புரம் உள்ளிட்ட பல்வேறு மாவட்டங்களைச் சேர்ந்த 300-க்கும் மேற்பட்ட இளம் படைப்பாளர்கள் கலந்து கொண்டனர்.
சமூக அக்கறை மற்றும் சமூக மாற்றத்தை மையமாகக் கொண்டு உருவாக்கப்பட்ட குறும்படங்கள் போட்டியில் இடம்பெற்றன.
Cars 327, Bikes 327 மற்றும் 8D Marketing Agency சார்பில் நடைபெற்ற இந்நிகழ்ச்சியில், 8D Marketing Agency நிறுவனத்தின் நிறுவனர் விஷ்ணு வேணுகோபால் உள்ளிட்டோர் கலந்து கொண்டனர்.
சினிமா என்பது வெறும் பொழுதுபோக்கிற்கான ஊடகம் மட்டுமல்லாமல், சமூகத்தில் நேர்மறையான மாற்றத்தை ஏற்படுத்தக்கூடிய சக்திவாய்ந்த கருவி என்பதை வலியுறுத்தும் வகையில் போட்டி அமைந்திருந்தது.
போட்டியாளர்கள் தங்களது தனித்துவமான சிந்தனைகளையும், சமூகத்தின் மீதான அக்கறையையும் குறும்படங்கள் மூலம் வெளிப்படுத்தினர்.
விழாவில் Double Positive Film Academy நிறுவனரான ரமேஷ் முருகன் சிறப்பு விருந்தினராக கலந்து கொண்டு, போட்டியாளர்களின் குறும்படங்களை பார்வையிட்டு, அவர்களின் திரைப்படப் பயணத்திற்கு வாழ்த்துகளை தெரிவித்தார்.
மேலும், இளம் படைப்பாளர்கள் தங்களது திறமைகளை தொடர்ந்து வளர்த்துக் கொண்டு, சமூகத்திற்கு பயனளிக்கும் நல்ல படைப்புகளை உருவாக்க வேண்டும் என அறிவுறுத்தினார்.
போட்டியில் சிறப்பாக செயல்பட்ட படைப்பாளர்களுக்கு முதல் பரிசாக ரூ.25,000, இரண்டாம் பரிசாக ரூ.15,000, மூன்றாம் பரிசாக ரூ.7,500 வழங்கப்பட்டது.
மேலும், Best Director, Best Actor, Best Actress, Best Cinematography, Best Editing, Best Child Artist, Best Screenplay உள்ளிட்ட பல்வேறு பிரிவுகளிலும் சிறந்த படைப்பாளர்களுக்கு விருதுகள் வழங்கப்பட்டன.
தமிழகத்தின் பல்வேறு மாவட்டங்களில் இருந்து இளம் படைப்பாளர்களை ஒருங்கிணைத்து நடத்தப்பட்ட ‘Kutty Director Season 2’, சமூக அக்கறையுடன் கூடிய புதிய தலைமுறை திரைப்படக் கலைஞர்களை உருவாக்குவதற்கான முக்கிய முயற்சியாக அமைந்தது.